Plantun de Prouvènço

Pèr coumpara dos planto d'encò nostre

Alyssum flexicaule & Scleranthus annuus

Alyssum flexicaule

Brassicaceae Cruciferae

Noms en français : Alysson du Ventoux, Passerage du Ventoux.

Descripcioun :
Aquesto gourbèio-d'or es uno planto raro que trachis soulamen en aut de Ventour (endemico). Se recounèis à si fueio en espatulo e pelouso e à si petalo jauno esmarjinado e pulèu grando (6 mm). Coumpara emé la gourbèio-d'or-di-fueio-de-serpoulet que ié sèmblo un pau. De nouta qu'èi un pau diferènto d'Alyssum cacuminum que trachis dins li pirenèu.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 15 (20) cm
Fueio : alterno
Tipe bioulougico : Camefite
Cicle bioulougico : Planto renadivo

Gènre : Alyssum
Famiho : Brassicaceae
Famiho classico : Cruciferae

Coulour de la flour : Jauno
Petalo : 4
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : Pancaro entresigna
Aparado : Vo
Remarco : Endemico de Ventour

Liò : Auto mountagno - Esboudèu - Tepiero roucaiouso
Estànci : Subaupen à Aupen
Couroulougi : Pancaro entresigna
Ref. sc. : Alyssum flexicaule Jord., 1846

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.